புறங்கூறாமை

புறங்கூறாமை

• 
  

நேரில் இல்லாதார்பற்றி

நிறையழியப் பேசுவோர்

ஊருக்கு நூற்றுவர்

முகத்தின்முன் ஒன்றாக

முகத்தின்பின் வேறாகப் பேசுவோன்

அகமெல்லாம் அழுக்கு

இல்லாத ஆள்குறித்துப்

பொல்லாது சொல்பவன்

மனிதக் கீழ்மையின் நாயகன்

நேர்நின்று காறியுமிழலாம்

புறம்போய்ச் செய்யலாமா

புன்னகை ?

புறஞ்சொல் வல்லாரை

அறவோரின் அறிவு

அப்படியே அறியும்

புறங்கூறித் திரிபவனின் மறுபுறம்

வௌவால்கள் தொங்கியுறங்கும்

பாழிடம்

உவந்து உள்ளம் களிக்கும் நட்பை

புறங்கூறுவோன்

என்றும் பெறத் தெரியாதவன்

உடனிருந்து புறம்சொல்பவனால்

தோழர்கள் தொலைவர்

பெருகுவர் எதிரிகள்

புறங்கூறிக் குடிகெடுத்தோன்

மண்ணுக்குப் போகுமுன்

மனப்பிணியுற மாட்டானா ?

மாற்றானைத் தூற்றும்முன்

மனக்கண்ணாடியில் கண்டாயா

உன்னழகை ?